ཕྱི་ལོ་༢༠༢༡ ཟླ་༦ ཚེས་༢༨ ཉིན་དབུ་བཟུང་སྟེ་བདུན་ཕྲ་གཉིས་ལྷག་ཙམ་གྱི་རིང་། འཕགས་ཡུལ་ཁམས་སྒར་འབྲུག་མཐོ་སློབ་དྷརྨ་ཀཱ་རས་གོ་སྒྲིག་འོག་ལོ་ཕྱེད་རྒྱུགས་སྤྲོད་ཀྱི་རང་སྦྱོང་དུས་ཚོད་དང་བསྟུན། མཁན་པོ་བསྟན་འཛིན་སྟོབས་རྒྱལ་མཆོག་གིས་འདི་ག་གཙུག་ལག་སློབ་གཉེར་ཁང་དུ། དཔལ་བཞད་པ་རྡོ་རྗེ་ཉིད་བསམ་བཞིན་དུ་སླར་ཡང་གངས་རིའི་ཁྲོད་དུ་སྒྲུབ་བསྟན་སྤེལ་ཕྱིར་བྱོན་པ་དཔལ་རྒྱལ་བ་རྒོད་ཚང་པ་མགོན་པོ་རྡོ་རྗེའི་བཀའ་འབུམ་ཆ་ཚང་དང་། འདུལ་བ་རྒྱ་མཚོའི་མངའ་བདག་ཀུན་མཁྱེན་མཚོ་སྣ་བ་ཤེས་རབ་བཟང་པོའི་འདུལ་ཊིཀ་མཚོ་ཆེན་བཅས་ཀྱི་ལྗགས་ལུང་གནང་ཡོད། འོན་ཀྱང་ཏོག་དབྱིབས་ནད་ཡམས་ཀྱིས་སྤྱི་སྒེར་ཚང་མར་དཀའ་ངལ་རབས་དང་རིམ་པ་ཞིག་བཟོ་བཞིན་ཡོད་པ་བཞིན། ད་དུང་ཉེན་ཁ་ཡོད་མུས་སུ་སོང་བས་ནད་ཡམས་སྔོན་འགོག་དང་འབྲེལ་ནས། ད་ཐེངས་ཀྱི་ལྗགས་ལུང་འདི་ཉིད་བཤད་གྲྭའི་ལྕགས་རི་ནང་དུ་བཞུགས་པའི་དགེ་སློབ་རྣམས་ཁ་གཙང་གི་ཆེད་དུ་གོ་སྒྲིག་ཞུས་པ་ཞིག་ཆགས་ཡོད།། ༢༠༢༡།༧།༡༣།