གདན་ས་ཁམས་པ་སྒར་འབྲུག་མཐོ་སློབ་དྷརྨ་ཀཱ་ར།
• ཆོས་འཁོར་བསྐོར་བའི་དུས་ཆེན་བསུ། •
བོད་རྒྱལ་ལོ་ ༢༡༥༣ བོད་ཟླ་ ༦ བོད་ཚེས་ ༤ ཉིན་ནི། འོ་སྐོལ་གྱི་སྟོན་པ་ཤཀྱཱའི་རྒྱལ་པོ་མངོན་པར་རྫོགས་པར་སངས་རྒྱས་ནས་བདུན་ཕྲག་བདུན་ཆོས་མ་གསུངས་པར་བཞུགས། དེའི་རྗེས་སུ་ལྷ་ཚངས་པ་ལ་སོགས་པས་གསོལ་བ་བཏབ་པ་ལ་བརྟེན། བཀའ་དང་པོ་བདེན་པ་བཞིའི་ཆོས་འཁོར་བསྐོར། དེ་རིང་བྱེས་ཀྱི་གདན་ས་ཁམས་པ་སྒར་བཤད་གྲྭ་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་དུ། མཁན་སྤྲུལ་དགེ་སློབ་འདུས་ཚོགས་དང་དད་ལྡན་སེར་སྐྱ་མི་དམངས་མཉམ་འཛོམས་བྱས་ཏེ། ཕྱག་ཚོད་ ༥ དང་ཕྱེད་ནས་ཚོགས་སུ་བཞུགས་གྲལ་དུ་ཁོད་ནས་སྐྱབས་སེམས། གནས་ཆོག འཆད་རྩོད་རྩོམ་གསུམ་གྱི་སྒོ་ནས་སྟོན་པའི་གསུང་གི་མཛད་པ་བསྲུང་རྩི་ཞུས་ཡོད།
